Naniphayo ang aktres at mananayaw na si Maja Salvador kay DJ Loonyo matapos nitong magsabi ng salitang hindi niya nagustuhan habang live na umeere ang palabas na PoPinoy Media Conference, kung saan pawang mga hurado at mentor ang dalawa, noon lamang ika-30 ng Mayo, taong kasalukuyan.
Ang PoPinoy Media Conference ay isang bagong-bagong palabas ng TV5 na naglalayong hanapin ang susunod na matagumpay na banda mula sa mga Pilipino. Kung saan ay hosts ang The Phenomenal Star Maine Mendoza at Paolo Ballesteros, The King of Transformation.
Habang ang mga mentors o headhunters naman ng PoPinoy ay sina Maja Salvador, Jay R, DJ Loonyo, at Kayla Rivera.
Sa isang pagkakataon sa palabas, tinanong sila kung paano nga ba nila iha-handle ang bashers ng kanilang show.
Sumagot si Maja, “Ready na akong i-bash, kasi okay lang ma-bash; kasi at the end of the day, at least, may matutulungan kaming mga…ahm…mga batang Pinoy; mga next gen na matupad yung mga pangarap nila. ‘Yun naman ang goal naming, ‘yun naman ang importante sa amin. ‘Di bale nang may masabi silang… kung anong gusto nilang sabihin, go!”
Napabilib naman ni Maja ang kaniyang mga kasama sa kaniyang sinabi.
Samantala, panimula naman ni DJ Loonyo, “Sa’kin naman, ano, sanay na ‘ko sa bash. Pero hindi naman sa ano, kasi yung pangba-bash… Ito naman kasi po, ano… preparation as a judge. I believe kinuha naman ako ngPoPinoy based on kung saan ako nanggaling, as a dancer; as a choreographer. And itong show naman is sing and dance naman kasi. So, dun ako naka-focus naman; sa sayaw nila.”
“So, kung meron mang masabi yung ibang tao based on kung pa’no ko jinudge yung grupo na ‘yun, dedma na lang po, kasi ako lang naman nakakaintindi. Ako lang naman nakakaintindi kung anong nakikita ko as a choreographer,” dagdag pa nito.
Sa kaniya ngang sumunod na sinabi, doon na na –offend si Maja.
“Ang importante is, ‘yun nga sabi nga ni Ate Maja is ano…” sabi nito ngunit hindi na natuloy sapagkat pinutol na ni Maja ang iba niya pang sasabihin.
“Ateeeee?” Tila hindi makapaniwalang tanong ni Maja sa pagtawag sa kaniya ni DJ Loonyo. Nagtawanan naman ang mga hosts at iba pang headhunters sa turan nito.
“Guys, sa lahat nang nanonood ng mediacon ngayon, pakibash,” pabirong pagtukoy ni Maja kay DJ Loonyo
Nagpaliwanag naman si DJ Loonyo: “Sorry, nababasag kasi talaga ako ‘pag tinatawag ko lang na Jay R o Maja, nababasag ako e. Hindi ko kayang sabihin ng diresto.”
Upang mabawasan ang kaseryosohan ng lalaki, niloko na lamang ito ni Maja, “Ikaw talaga, Lolo Loo.”
Napuno ng mga halakhak ang studio sa pang-aasar na ito ni Maja.
Inihayag din naman ni DJ Loonyo na miski kay Maine Mendoza ay ‘Ate Maine’ ang kaniyang tawag.